Ribeira.-10/11/2011 Efectivos do Consorcio Provincial Contraincendios e Salvamento da Coruña con base no Parque e Subparque de Bombeiros do Barbanza interviñeron como consecuencia dun accidente de tráfico acontecido á altura da parroquia de Oleiros, no termo municipal de Ribeira.
O Centro de Coordinación de Emerxencias 112-Galicia recibiu o aviso e deseguido se mobilizaron os bombeiros, os que, cando chegaron ó lugar do accidente, atopáronse cun vehículo cun forte golpe no costado esquerdo e co condutor atrapado no mesmo como consecuencia dunha colisión entre dous coches. O seu labor consistiu en estabilizar o automóbil, na liberación da persoa atrapada para que fora atendida polos medios sanitarios e na limpeza da vía dos restos dos autos.
Ata o punto desprazáronse dotacións do Parque e Subparque de Bombeiros do Barbanza. Ademais dos bombeiros, tamén colaboraron na intervención efectivos da Policía Local, da Garda Civil de Tráfico, Voluntarios de Protección Civil, do GRUMIR, do 061 e o servizo de grúa. Unha vez rematado o servizo, recollidos os datos necesarios e o material empregado, regresaron á súa base, quedando de novo operativos.