Rianxo.-19/05/2013 Efectivos do Consorcio Provincial Contraincendios e Salvamento da Coruña con base no Parque de Bombeiros do Barbanza extinguiron un incendio nun inmoble situado na rúa Arral Fincheira nº 132, no Concello de Rianxo.
O Centro de Coordinación de Emerxencias 112-Galicia recibiu o aviso e deseguido se mobilizaron os bombeiros, os que, cando chegaron ó lugar do incidente, atopáronse cun incendio nunha cheminea, producida pola feluxe acumulada no interior da mesma. O seu labor consistiu en controlar o lume e en arrefriar a cheminea. A continuación examinaron coa cámara térmica a temperatura da mesma, para comprobar que a zona quedaba totalmente segura.
Ata o lugar do incidente desprazáronse un cabo xefe de quenda, dous bombeiros e os vehículos autobomba urbana e furgón de servizos varios. Ademais dos bombeiros, tamén colaboraron na intervención membros da Garda Civil e Voluntarios de Protección Civil de Rianxo. Unha vez rematado o servizo, recollidos os datos necesarios e o material empregado, regresaron á súa base, quedando de novo operativos.