Santa Comba.-20/08/2011 Tres efectivos do Consorcio Provincial Contraincendios e Salvamento da Coruña con base no Parque de Bombeiros do Xallas-A Barcala extinguiron un incendio nun vehículo na parroquia da Pereira, no termo municipal de Santa Comba.
O Centro de Coordinación de Emerxencias 112-Galicia recibiu o aviso e deseguido se mobilizaron os bombeiros, os que, cando chegaron ó lugar do incidente, atopáronse cun automóbil sen ocupantes e cheo de fume no medio da estrada. Abriron as portas e viron que o que ardera fora a alfombra do condutor, o asento e o volante. O seu labor consistiu en retirar estes elementos, arrefriándoos con auga, e na desconexión da batería como medida preventiva.
Ata o lugar do incidente desprazáronse un cabo xefe de quenda, dous bombeiros e os vehículos autobomba urbana e nodriza. Ademais dos bombeiros, tamén colaboraron na intervención membros da Garda Civil de Tráfico de Corcubión e Voluntarios de Protección Civil de Santa Comba. Unha vez rematado o servizo, recollidos os datos necesarios e o material empregado, regresaron á súa base, quedando de novo operativos.